SA PAGTATAGUMPAY
maraming dapat gawin upang magtagumpay
sa ating buhay, sa bahay, sa hanapbuhay
anumang suliranin ang nakabalatay
ay malalampasan kapag tayo'y nagsikhay
ang buhay nati'y di pulos laban at galit
dahil sa mga karapatang pinagkait
dahil binubusabos na ang maliliit
kundi mayroon ding panahon ng pag-awit
buhay ay punong-puno ng pakikibaka
lalo na't hanap ay panlipunang hustisya
paano wakasan ang mga dinastiya
na isang dahilan ng bulok na sistema
magtatagumpay lang tayo sa minimithi
kung sama-samang kikilos ang ating uri
upang wakasan na ang sangkaterbang hikbi
dahil sa kagagawan ng kuhila't imbi
- gregoriovbituinjr.
03.03.2025
Walang komento:
Mag-post ng isang Komento